शेतातला गोडवा’ ठरला मृत्यूचा फास! कन्नड च्या रस्त्यावर हृदयद्रावक दुर्घटना!”

छत्रपती संभाजीनगर: जिल्ह्यातील कन्नड -पिशोर मार्गावर सोमवारी मध्यरात्री भीषण अपघात घडला. ऊस वाहतूक करणाऱ्या ट्रकवर बसून प्रवास करणाऱ्या १७ मजूरांवर काळाने झडप घातली. ट्रक उलटल्याने हे सर्व मजूर उसाखाली दबले. अपघात इतका भयंकर होता की अनेकांना ढिगाऱ्याखालून बाहेर काढणंही कठीण झालं. या हृदयद्रावक घटनेत चार मजूरांचा जागीच मृत्यू झाला असून, १३ जणांना स्थानिकांच्या मदतीने वाचवण्यात यश आलं आहे. जखमींना तात्काळ रुग्णालयात दाखल करण्यात आलं असून, त्यापैकी काहींची प्रकृती अत्यवस्थ आहे.

सोमवारी रात्री साधारण १२ वाजताच्या सुमारास ही घटना घडली. कन्नड-पिशोर मार्गावर उसाने भरलेला ट्रक भरधाव वेगात जात असताना चालकाचा वाहनावरील ताबा सुटला. काही क्षणांतच ट्रक रस्त्यावर उलटला. या ट्रकमध्ये उसावर बसून १७ मजूर प्रवास करत होते. ट्रक उलटताच हे सर्व मजूर उसाच्या ढिगाऱ्याखाली अडकले. काही क्षणातच रस्त्यावर एकच गोंधळ उडाला.

अपघाताची माहिती मिळताच परिसरातील नागरिकांनी घटनास्थळी धाव घेतली. कोणत्याही यंत्रसामग्रीशिवाय स्थानिकांनी केवळ मनगटाच्या बळावर उसाचे ढिगारे बाजूला सारून मदतकार्य सुरू केलं. तब्बल तासाभराच्या अथक प्रयत्नांनंतर १३ मजूरांना वाचवण्यात यश आलं. त्यांना तात्काळ नजीकच्या रुग्णालयात दाखल करण्यात आलं.

मात्र, या प्रयत्नांतही चार मजुरांना वाचवता आलं नाही. ढिगाऱ्याखाली दबून त्यांचा जागीच मृत्यू झाला. मृत्यू झालेल्या मजुरांची ओळख पटविण्याचे काम पोलिसांकडून सुरू आहे.

घटनेची माहिती मिळताच पोलिसांनी घटनास्थळी धाव घेतली. अपघात कशामुळे घडला याचा तपास सुरू आहे. ट्रक चालकाने निष्काळजीपणा केला का, ट्रकमध्ये तांत्रिक बिघाड झाला का, याचा शोध घेतला जात आहे. दरम्यान, ट्रक चालक फरार असल्याचेही प्राथमिक माहितीत समोर आले आहे.

या अपघातामुळे परिसरात शोककळा पसरली आहे. मजूर हे आपल्या कुटुंबासाठी रोजगारासाठी राबणारे हात होते. त्यांचा असा अचानक मृत्यू झाल्याने त्यांच्या कुटुंबावर दु:खाचा डोंगर कोसळला आहे. जिल्हाभरातून या घटनेबद्दल हळहळ व्यक्त केली जात आहे.