वाल्मिक कराडचे परदेशात पलायन करण्याचे मार्ग बंद, मोठी माहिती समोर

बीड: बीडमधील मस्साजोगचे सरपंच संतोष देशमुख यांच्या हत्या प्रकरणाचा तपास काही दिवसांपूर्वी सीआयडीकडे वर्ग करण्यात आला होता. आता या प्रकरणात महत्त्वाची माहिती समोर आली आहे. सीआयडीच्या तपासात पाच मोठे अपडेट समोर आले आहेत, ज्यामध्ये आरोपींच्या गाडीवर ठसे जुळवणे, फरार आरोपींचे मोबाईल सापडणे आणि बँक खाती गोठवणे यांसारखी माहिती आहे.

वाल्मिक कराड यांच्याशी संबंधित महिलेची चौकशी

संतोष देशमुख हत्येप्रकरणी बीडमध्ये सीआयडीच्या नऊ टीम कार्यरत आहेत. या टीममध्ये सुमारे 150 अधिकारी आणि कर्मचारी कार्यरत आहेत. या सर्वांनी आतापर्यंत 100 हून अधिक लोकांची चौकशी केली आहे. वाल्मिक कराड यांच्याशी संबंधित असलेल्या एका महिलेची आज सकाळपासून चौकशी सुरू असल्याची माहिती समोर आली आहे.

गाडीवर ठसे आणि फरार आरोपींचे मोबाईल

देशमुख यांच्या अपहरणासाठी वापरलेल्या गाडीवर आरोपींचे ठसे जुळले आहेत. गाडीत फरार आरोपींचे मोबाईल देखील सापडले आहेत. याचा तपास सीआयडी पथक फॉरेन्सिक तपासासाठी करत आहे.

बँक खाती गोठवली, मालमत्ता जप्तीसाठी अर्ज

मुख्यमंत्री देवेंद्र फडणवीस यांच्या आदेशानुसार, आज चार फरार आरोपींच्या बँक खाती गोठवण्यात आली आहेत. याशिवाय, आरोपींच्या मालमत्ता जप्त करण्यासाठी सीआयडीने न्यायालयाकडे अर्ज दाखल केला आहे.

फरार आरोपींच्या परदेशी जाण्याचा मार्ग बंद

फरार आरोपींपैकी एकाच्या कडे पासपोर्ट असल्याची माहिती मिळाली होती. मात्र, तो अटकेत असल्याने इतर आरोपी परदेशी जाण्याचा मार्ग बंद झाला आहे. वाल्मिक कराड यांच्यावर दाखल असलेल्या गुन्ह्यांमुळे त्यांना पासपोर्ट मिळालेला नाही, अशी माहिती समोर आली आहे.

संतोष देशमुख हत्येच्या तपासात सीआयडीकडून कडक चौकशी सुरू असून, पुढील तपासामध्ये अधिक माहिती समोर येण्याची शक्यता आहे.