बीड: मस्साजोग गावचे माजी सरपंच संतोष देशमुख यांच्या हत्या प्रकरणातील मुख्य आरोपी वाल्मिक कराड यांना अटक करण्याची मागणी होत असतानाच CT, त्यांच्या समर्थनार्थ मयुरी बांगर या तरुणी ने बीड जिल्हाधिकारी कार्यालयासमोर उपोषण सुरू केले आहे.
मयुरी बांगर यांची भूमिका:
मयुरी बांगर या तरुणी चे म्हणणे आहे की, वाल्मिक कराड यांच्यावर दाखल झालेले गुन्हे राजकीय द्वेषातून प्रेरित आहेत. त्यांनी सांगितले की, “वाल्मिक कराड यांनी समाजासाठी मोठ्या प्रमाणावर काम केले आहे. त्यांच्यावर खोटे गुन्हे लावणे हे अन्यायकारक आहे. आम्ही त्यांचे समर्थन करत असून, त्यांच्यावरील गुन्हे मागे घ्यावेत.”
वाल्मिक कराड अद्याप फरार:
संतोष देशमुख हत्या प्रकरणातील मुख्य आरोपी वाल्मिक कराड अद्याप फरार आहेत. त्यांच्या शेवटच्या लोकेशनचा मागोवा घेतला असता, ते ११ डिसेंबर रोजी उज्जैन, मध्य प्रदेश येथे महाकाल ज्योतिर्लिंगाच्या दर्शनाला गेले असल्याचे समोर आले आहे. त्यानंतर त्यांचा फोन बंद असल्याने त्यांचा शोध घेणे कठीण झाले आहे.
भाजप आमदार सुरेश धस यांची मागणी:
भाजप आमदार सुरेश धस यांनी या प्रकरणात वाल्मिक कराड यांना लवकरात लवकर अटक करण्याची मागणी केली आहे. त्यांच्या मते, संतोष देशमुख हत्या प्रकरणातील मुख्य सूत्रधार कराडच आहेत.
संतोष देशमुख हत्या प्रकरणाचा तपास:
संतोष देशमुख हत्या प्रकरणाचा तपास सध्या सीआयडीकडून वेगाने सुरू आहे. मुख्य आरोपी वाल्मिक कराड अद्याप फरार असून त्याचा शोध घेण्यासाठी विविध पथके सक्रिय आहेत. या प्रकरणात सीआयडीने शंभरहून अधिक जणांची चौकशी केली असून, त्यामध्ये कराड यांच्या पत्नीचाही समावेश आहे. तपासादरम्यान, फरार आरोपींची बँक खाती गोठवण्यासाठी १३ बँकांना पत्र पाठवण्यात आले असून, त्यांच्या मालमत्तेच्या जप्तीची कार्यवाही पूर्ण करण्यात आली आहे. मुख्यमंत्री देवेंद्र फडणवीस यांनी आरोपींना लवकरच अटक केली जाईल, असा विश्वास व्यक्त केला आहे. दरम्यान, बीड जिल्ह्यात सरपंचांच्या हत्येमुळे राज्यातील सरपंच परिषद आक्रमक झाली असून त्यांनी राज्य सरकारला ७ जानेवारीपर्यंत ठोस पावले उचलण्याची मुदत दिली आहे;अन्यथा मुंबईत धरणे आंदोलन करण्याचा इशारा त्यांनी दिला आहे. सध्या तपास अधिकाधिक गतीने सुरू असून, संबंधित आरोपींना न्यायालयासमोर उभे करण्यासाठी सीआयडी प्रयत्नशील आहे.