पुण्यात कराड सोबत ते दोघे कोण होते, आणि त्यांना कशाची भीती होती ?

पुणे: बीड जिल्ह्यातील सरपंच संतोष देशमुख यांच्या हत्येप्रकरणात संशयित ठरलेल्या वाल्मिक कराड यांनी मंगळवारी पुण्यात सीआयडी कार्यालयात स्वतःला पोलिसांच्या हवाली केले. सीआयडी कार्यालयात पोहोचण्यापूर्वी त्यांच्या समर्थनार्थ कार्यकर्त्यांनी मोठ्या संख्येने जमाव केला होता.

वाल्मिक कराड हे एमएच 23 BG 2231 क्रमांकाच्या पांढऱ्या स्कॉर्पिओ कारमधून दुपारी 12 वाजता सीआयडी कार्यालयात पोहोचले. या गाडीत कराड यांच्यासोबत दोन व्यक्ती होत्या. या व्यक्तींनी माध्यमांशी संवाद साधताना वाल्मिक कराड यांच्या हालचालींबाबत माहिती दिली.

अक्कलकोट मंदिरातून आले असल्याचे विधान

वाल्मिक कराड यांच्या सोबत असलेल्या एका व्यक्तीने माध्यमांना सांगितले की, “आम्ही अक्कलकोटच्या स्वामी समर्थ मंदिरातून आलो आहोत. परंतु गेल्या आठ दिवसांत वाल्मिक कराड कुठे होते, याची मला माहिती नाही.”

त्याच वेळी गाडीत असलेल्या दुसऱ्या व्यक्तीने, जो बीड जिल्ह्यातील एक नगरसेवक आहे, सांगितले की, “मी गेल्या तीन दिवसांपासून वाल्मिक कराड यांच्यासोबत आहे. परवापासून ते पुण्यात आहेत.” याशिवाय त्यांनी सांगितले की, कराड यांच्यावर खोटा गुन्हा दाखल करण्यात आल्यामुळे त्यांना भीती वाटत होती.

कराड यांचा व्हिडीओ संदेश

सीआयडी कार्यालयात पोहोचण्यापूर्वी वाल्मिक कराड यांनी एक व्हिडीओ प्रसिद्ध करून आपली भूमिका मांडली. त्यांनी म्हटले, “सरपंच संतोष देशमुख यांच्या मारेकऱ्यांना अटक करून फाशीची शिक्षा द्यावी. माझ्यावर केवळ राजकीय द्वेषातून खोटे आरोप करण्यात आले आहेत. जर पोलीस तपासात मी दोषी ठरलो, तर न्यायालयाच्या शिक्षेसाठी मी तयार आहे.”

गुन्ह्याचा तपास गतीने होण्याची अपेक्षा

सरपंच संतोष देशमुख हत्या प्रकरणात वाल्मिक कराड यांचे आत्मसमर्पण झाल्यामुळे तपासाला गती मिळण्याची शक्यता वर्तवली जात आहे. मात्र, या प्रकरणातील सत्य समोर येण्यासाठी सीआयडीच्या तपासावर सर्वांचे लक्ष लागले आहे.